மக்கும் குப்பைகளில் இருந்து தயாரிப்பு; கிலோ ரூ.5-க்கு விற்பனை – பொதுமக்கள் வரவேற்பு!
மேட்டுப்பாளையம்:
கோவை மாவட்டம், மேட்டுப்பாளையம் நகராட்சியில் வீடுகளில் இருந்து சேகரிக்கப்படும் மக்கும் குப்பைகளைக் கொண்டு தரமான இயற்கை உரம் தயாரிக்கப்பட்டு, ‘செழிப்பு’ என்ற பெயரில் பொதுமக்களுக்கு விற்பனை செய்யப்பட்டு வருகிறது.
மேட்டுப்பாளையம் நகராட்சி நிர்வாகம் மற்றும் தூய்மைப் பணியாளர்கள் இணைந்து மேற்கொண்டு வரும் இத்திட்டத்தின் மூலம், வீடுகளில் இருந்து சேகரிக்கப்படும் மக்கும் குப்பைகள் முறையாகப் பிரிக்கப்பட்டு இயற்கை உரமாக மாற்றப்படுகின்றன. குப்பைகளை பயனுள்ள வளமாக மாற்றும் இந்த முயற்சி சுற்றுச்சூழல் பாதுகாப்பில் முக்கியப் பங்கு வகிக்கிறது.
இயற்கையான முறையில் தயாரிக்கப்படும் ‘செழிப்பு’ உரம் விவசாய நிலங்கள், வீட்டுத் தோட்டங்கள், மாடித் தோட்டங்கள், அழகுச் செடிகள் மற்றும் வண்ண மலர்ச் செடிகளின் வளர்ச்சிக்கு பயன்படுத்தப்படுகிறது. மண்ணின் வளத்தை மேம்படுத்தவும், இயற்கை விவசாயத்தை ஊக்குவிக்கவும் இந்த உரம் உதவுகிறது.
பொதுமக்கள் பயன்பெறும் வகையில், மேட்டுப்பாளையம் நகராட்சி அலுவலகம் மற்றும் குறிப்பிட்ட விற்பனை மையங்களில் ஒரு கிலோ இயற்கை உரம் ரூ.5 என்ற மலிவான விலையில் விற்பனை செய்யப்பட்டு வருகிறது. இதனால் விவசாயிகள் மட்டுமின்றி, வீட்டுத் தோட்டம் மற்றும் மாடித் தோட்டம் அமைத்து செடிகளை வளர்ப்பவர்களும் குறைந்த விலையில் இயற்கை உரத்தைப் பெற்று பயன்பெறலாம்.
நகராட்சியின் இந்த இயற்கை உரம் தயாரிப்பு மற்றும் விற்பனை முயற்சி சமூக ஆர்வலர்கள் மத்தியில் வரவேற்பைப் பெற்றுள்ளது. குப்பைகளை உரமாக மாற்றுவதன் மூலம் சுற்றுச்சூழல் மாசுபாட்டைக் குறைப்பதுடன், இயற்கை வளங்களைப் பாதுகாக்கவும் வழிவகை ஏற்படுகிறது.
மேலும், இயற்கை உரங்களைப் பயன்படுத்துவதன் மூலம் மண்ணின் வளத்தை மேம்படுத்தவும், ரசாயன உரங்களின் பயன்பாட்டைக் குறைக்கவும், நஞ்சில்லா விவசாயத்தை ஊக்குவிக்கவும் முடியும் என நகராட்சி நிர்வாகத்தினர் தெரிவித்துள்ளனர்.
எனவே, பொதுமக்கள் மேட்டுப்பாளையம் நகராட்சியின் ‘செழிப்பு’ இயற்கை உரத்தை வாங்கிப் பயன்படுத்தி பயனடையுமாறு நகராட்சி நிர்வாகம் மற்றும் சுகாதாரத்துறையினர் கேட்டுக்கொண்டுள்ளனர்.
You must be logged in to post a comment.