இந்திய விடுதலைப் போராட்ட வரலாற்றில் ஆங்கிலேயர்களுக்கு எதிராக வீரத்துடன் போராடிய மாமன்னர்கள் மருது பாண்டியர்களின் 225-வது நினைவு தினத்தை முன்னிட்டு, ராமநாதபுரம் அருகே உள்ள சூரங்கோட்டை பகுதியில் பெண்கள் பொங்கல் வைத்து வழிபாடு நடத்தினர்.
சிவகங்கைச் சீமையை ஆட்சி செய்த பெரிய மருது, சின்ன மருது ஆகிய சகோதரர்கள், ஆங்கிலேயர் ஆட்சிக்கு எதிராக ஆயுதம் ஏந்திப் போராடிய வீரத் தலைவர்களாக வரலாற்றில் போற்றப்படுகின்றனர். 1801-ஆம் ஆண்டு ஆங்கிலேயர்களுக்கு எதிரான தென்னிந்தியக் கிளர்ச்சியில் முக்கியப் பங்காற்றிய அவர்கள், மக்களை ஒன்றிணைத்து அந்நிய ஆட்சிக்கு எதிராகப் போராட அழைப்பு விடுத்தனர். இறுதியில், 1801-ஆம் ஆண்டு அக்டோபர் 24-ஆம் தேதி திருப்பத்தூரில் இருவரும் ஆங்கிலேயர்களால் தூக்கிலிடப்பட்டனர். அவர்களின் வீரமும் தியாகமும் மக்களால் நினைவுகூரப்பட்டு வருகின்றன.
இந்நிலையில், சூரங்கோட்டையில் முன்னாள் ஊராட்சி மன்றத் தலைவர் தெய்வம் தலைமையில் நினைவு தின நிகழ்ச்சி நடைபெற்றது. இதில் பெண்கள் பொங்கல் வைத்து மருது பாண்டியர்களை நினைவுகூர்ந்து வழிபட்டனர். தொடர்ந்து கும்மியடித்தும், குலவையிட்டும், சூடம் ஏந்தியும் அவர்களின் வீரத்தையும் தியாகத்தையும் போற்றி மரியாதை செலுத்தினர்.
இந்நிகழ்ச்சியில் சூரங்கோட்டை மற்றும் சுற்றுவட்டாரப் பகுதிகளைச் சேர்ந்த ஏராளமான பொதுமக்களும் பெண்களும் கலந்து கொண்டனர்.
மருது பாண்டியர்களின் வரலாற்றையும், நாட்டிற்காக அவர்கள் செய்த தியாகத்தையும் அடுத்த தலைமுறையினருக்கு எடுத்துரைக்கும் வகையில் இந்நிகழ்ச்சி அமைந்தது. நிகழ்ச்சியின் நிறைவாகப் பங்கேற்ற அனைவருக்கும் அன்னதானம் வழங்கப்பட்டது.
You must be logged in to post a comment.