ராமநாதபுரம் மாவட்டம், திருவாடானை மற்றும் அதன் சுற்றுவட்டாரப் பகுதிகளில் இன்று காலை வானில் அரிய இயற்கை நிகழ்வு ஒன்று கண்ணில் பட்டது. சூரியனைச் சுற்றி முழுமையான வட்டவடிவில், வானவில்லின் நிறங்களை ஒத்த ஒளிவட்டம் தோன்றியதால் பொதுமக்கள் ஆச்சரியத்துடன் வானத்தை நோக்கி ரசித்தனர்.
இந்த அரிய காட்சியை பலர் தங்களது செல்போன்களில் புகைப்படம் மற்றும் வீடியோவாக பதிவு செய்து சமூக வலைத்தளங்களில் பகிர்ந்ததால், அந்தக் காட்சிகள் வேகமாகப் பரவி வருகின்றன.
அறிவியல் ரீதியாக இந்த நிகழ்வு ’22 டிகிரி ஹாலோ’ (22° Halo) என்று அழைக்கப்படுகிறது. வளிமண்டலத்தின் மிக உயரத்தில் காணப்படும் சிரஸ் மேகங்களில் உள்ள அறுகோண வடிவ பனித்துகள்கள் வழியாக சூரிய ஒளி விலகி மற்றும் பிரதிபலிப்பதால் இந்த அழகிய ஒளிவட்டம் உருவாகிறது.
இந்த நிகழ்வு பார்ப்பதற்கு வியப்பூட்டுவதாக இருந்தாலும், இது முற்றிலும் இயல்பான வளிமண்டல ஒளியியல் நிகழ்வே தவிர, நிலநடுக்கம் அல்லது வேறு இயற்கைப் பேரிடருக்கான அறிகுறி அல்ல என்று அறிவியல் நிபுணர்கள் விளக்குகின்றனர்.
சூரியனை நேரடியாக வெறும் கண்களால் உற்றுப் பார்ப்பது கண்களுக்கு பாதிப்பை ஏற்படுத்தக்கூடும். எனவே, இந்த ஒளிவட்டத்தைப் பார்ப்பவர்கள் சூரியனை நேரடியாகப் பார்க்காமல், தேவையெனில் அதற்கென வடிவமைக்கப்பட்ட பாதுகாப்பான சூரியக் கண்ணாடிகளை மட்டுமே பயன்படுத்த வேண்டும் என நிபுணர்கள் அறிவுறுத்தியுள்ளனர்.
வானில் தோன்றிய இந்த அரிய ஒளிவட்டம், இயற்கையின் அழகையும் அற்புதத்தையும் ஒருசேர உணர்த்திய நிகழ்வாக
அமைந்துள்ளது.
You must be logged in to post a comment.