ராமநாதபுரம் மாவட்டம், திருவாடானை பேருந்து நிலையத்தில் பொதுமக்கள் முன்னிலையில் தாய் மற்றும் மகன் மீது நடத்தப்பட்டதாகக் கூறப்படும் தாக்குதல் சம்பவம் பெரும் பரபரப்பை ஏற்படுத்தியுள்ளது. இதுதொடர்பான வீடியோ சமூக வலைதளங்களில் வைரலாக பரவி வருகிறது.
தகவலின்படி, திருவாடானை அண்ணா நகர் பகுதியைச் சேர்ந்த நாகவல்லி மற்றும் மகாலிங்கம் குடும்பத்தினருக்கு இடையே நீண்டகாலமாக முன்விரோதம் இருந்து வந்ததாகக் கூறப்படுகிறது. இந்த நிலையில், பேருந்து நிலையத்தில் நாகவல்லி மற்றும் அவரது மகனை ஒரு கும்பல் கட்டைகளுடன் விரட்டிச் சென்று தாக்கியதாக தகவல் வெளியாகியுள்ளது.
தாக்குதலில் இருந்து தப்பிக்க இருவரும் ஓடியபோதும், தாக்குதல் நடத்தியவர்கள் கட்டைகளை வீசி தாக்க முயன்றதாக கூறப்படுகிறது. அப்போது அங்கு இருசக்கர வாகனத்தில் நின்று கொண்டிருந்த மற்றொருவர் மீதும் கட்டை பாய்ந்ததாகவும், அவர் அதிர்ஷ்டவசமாக உயிர் தப்பியதாகவும் தகவல்கள் தெரிவிக்கின்றன.
பொதுமக்கள் அதிகம் கூடும் பேருந்து நிலையம் போன்ற இடத்தில் இத்தகைய வன்முறை சம்பவம் நடைபெற்றிருப்பது அப்பகுதியில் சட்டம்-ஒழுங்கு நிலை மற்றும் பொதுமக்களின் பாதுகாப்பு குறித்து கேள்விகளை எழுப்பியுள்ளது.
இந்தச் சம்பவம் தொடர்பான வீடியோ சமூக வலைதளங்களில் பரவி வரும் நிலையில், திருவாடானை காவல்துறையினர் வழக்குப்பதிவு செய்து விசாரணை மேற்கொண்டு வருவதாகக் கூறப்படுகிறது.
சம்பவத்தில் தொடர்புடையவர்கள் மீது சட்டப்படி நடவடிக்கை எடுக்க வேண்டும் என்றும், பேருந்து நிலையங்கள் உள்ளிட்ட மக்கள் அதிகம் கூடும் பகுதிகளில் காவல்துறையினர் பாதுகாப்பு ஏற்பாடுகளை மேலும் பலப்படுத்த வேண்டும் என்றும் பொதுமக்கள் கோரிக்கை விடுத்துள்ளனர்.
You must be logged in to post a comment.