அச்சங்குடி, தொண்டியில் புதிய அங்கன்வாடி மையங்களும் திறப்பு – அமைச்சர் டாக்டர் ராஜீவ் திறந்து வைத்தார்!
ராமநாதபுரம் மாவட்டம், திருவாடானை தாலுகா தலைமை அரசு மருத்துவமனையில் ரூ.3.95 கோடி மதிப்பீட்டில் கட்டப்பட்டுள்ள கூடுதல் கட்டிடத்தை, சுற்றுச்சூழல் மற்றும் காலநிலை மாற்றத்துறை அமைச்சர் டாக்டர் ராஜீவ் ரிப்பன் வெட்டி பொதுமக்களின் பயன்பாட்டிற்காகத் திறந்து வைத்தார்.
திருவாடானை அரசு மருத்துவமனையில் பொதுமக்களுக்குக் கூடுதல் மருத்துவ வசதிகளை ஏற்படுத்தும் நோக்கில் கட்டப்பட்ட இந்தக் கட்டிடத்தின் பணிகள் முழுமையாக நிறைவடைந்ததைத் தொடர்ந்து, திறப்பு விழா நடைபெற்றது. இதன் மூலம் அப்பகுதி மக்களுக்கு மருத்துவச் சேவைகள் மேலும் மேம்படும் என்ற எதிர்பார்ப்பு ஏற்பட்டுள்ளது.
இதனைத் தொடர்ந்து, அச்சங்குடி ஊராட்சியில் அமைக்கப்பட்டுள்ள கட்டிடத்தையும், தொண்டி பேரூராட்சிப் பகுதியில் புதிதாகக் கட்டப்பட்டுள்ள அங்கன்வாடி மையத்தையும் அமைச்சர் டாக்டர் ராஜீவ் திறந்து வைத்தார்.
இந்நிகழ்ச்சியில் ராமநாதபுரம் மாவட்ட ஆட்சியர் சிவகுரு பிரபாகரன், பல்வேறு அரசுத்துறைகளைச் சேர்ந்த உயர் அலுவலர்கள், தமிழக வெற்றிக் கழக நிர்வாகிகள், தொண்டர்கள் மற்றும் பொதுமக்கள் உள்ளிட்ட பலர் கலந்து கொண்டனர்.
நிகழ்ச்சிக்கு வந்திருந்த பொதுமக்கள் மாவட்ட ஆட்சியர் சிவகுரு பிரபாகரனை நேரில் சந்தித்து தங்களது கோரிக்கைகள் தொடர்பான மனுக்களை வழங்கினர். பொதுமக்களின் கோரிக்கைகளைப் பரிசீலித்து உரிய நடவடிக்கை எடுக்கப்படும் என மாவட்ட ஆட்சியர் தெரிவித்தார்.
அரசு மருத்துவமனைக்குக் கூடுதல் கட்டிடம் மற்றும் புதிய அங்கன்வாடி மையங்கள் திறக்கப்பட்டுள்ளதன் மூலம் திருவாடானை மற்றும் சுற்றுவட்டாரப் பகுதிகளைச் சேர்ந்த பொதுமக்கள், குழந்தைகள் பயன்பெறுவார்கள் என எதிர்பார்க்கப்படுகிறது.
You must be logged in to post a comment.