தமிழகத்தில் தங்கத்தின் விலை வரலாறு காணாத புதிய உச்சத்தைத் தொட்டுள்ள நிலையில், நகைப்பிரியர்கள் மற்றும் சாமானிய மக்கள் கடும் அதிர்ச்சியில் ஆழ்ந்துள்ளனர். சேமிப்பின் அடையாளமாகக் கருதப்படும் தங்கம், தற்போது ஒரு சவரன் ரூ. 1 லட்சத்தைக் கடந்து விற்பனையாவதால், நடுத்தர வர்க்கத்தினர் தங்கம் வாங்குவதையே நினைத்துக்கூட பார்க்க முடியாத ஒரு சூழல் உருவாகியுள்ளது.
கடந்த சில நாட்களாகவே தங்கத்தின் விலை பெரும் ஊசலாட்டத்தைச் சந்தித்து வருகிறது. குறிப்பாக, இஸ்ரேல் – ஈரான் இடையேயான போர் பதற்றம் காரணமாக உலகளாவிய சந்தையில் தங்கம் விலை ஓரளவுக்குச் சரிவைக் கண்டது. இது நகைப்பிரியர்களிடையே ஒரு சிறிய நம்பிக்கையை ஏற்படுத்தியிருந்தது.
கடந்த மார்ச் 23-ஆம் தேதி, வரலாற்றிலேயே இரண்டாவது முறையாக ஒரே நாளில் காலை, மதியம், மாலை என மூன்று முறை தங்கம் விலையில் மாற்றங்கள் செய்யப்பட்டன. காலையில் குறைந்த விலை, மாலையில் திடீரென அதிகரித்தது. அதேபோல் நேற்று மார்ச் 24-ஆம் தேதியும், காலையில் அதிரடியாகச் சரிந்த தங்கம் விலை, மாலை வேளையில் மீண்டும் எகிறி அனைவரையும் வாய் பிளக்கச் செய்தது. நேற்று மாலை நிலவரப்படி ஒரு சவரன் ரூ. 1,06,000-க்கு விற்பனை செய்யப்பட்டது.
நேற்றைய உயர்வைத் தொடர்ந்து, இன்றும் தங்கத்தின் விலை கட்டுக்கடங்காமல் உயர்ந்துள்ளது. இன்றைய காலை நிலவரப்படி ஆபரணத் தங்கத்தின் விலை விபரங்கள் பின்வருமாறு:
22 காரட் தங்கம், கிராமுக்கு ரூ. 350 உயர்ந்து ஒரு கிராம் ரூ. 13,600-க்கும், சவரனுக்கு ரூ. 2,800 உயர்ந்து ஒரு சவரன் ரூ. 1,08,800-க்கும் விற்பனை செய்யப்படுகிறது.
18 காரட் தங்கம், கிராமுக்கு ரூ. 300 உயர்ந்து ஒரு கிராம் ரூ. 11,350-க்கும், சவரனுக்கு ரூ. 2,400 உயர்ந்து ஒரு சவரன் ரூ. 90,800-க்கும் விற்பனையாகிறது.
தங்கத்தைத் தொடர்ந்து வெள்ளியின் விலையும் இன்று அதிரடியாக உயர்ந்துள்ளது. கிராமுக்கு ரூ. 10 உயர்ந்து ஒரு கிராம் வெள்ளி ரூ. 260-க்கும், ஒரு கிலோ வெள்ளி ரூ. 2,60,000-க்கும் விற்பனை செய்யப்படுகிறது.
தொடர்ந்து ஏறுமுகத்தில் இருக்கும் இந்த விலை உயர்வு, இல்லத்தரசிகள் மற்றும் முதலீட்டாளர்கள் மத்தியில் பெரும் கவலையை ஏற்படுத்தியுள்ளது.
You must be logged in to post a comment.