திருமண வரவேற்பு முடிந்த சில மணி நேரத்தில் புதுமாப்பிள்ளை கொடூரமாக கொலை… கர்நாடகாவில் அதிர்ச்சி!

கர்நாடக மாநிலம் பெல்லாரி மாவட்டத்தில், திருமண வரவேற்பு நிகழ்ச்சி முடிந்து சில மணி நேரங்களிலேயே புதுமாப்பிள்ளை கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.

27 வயதான நபி ரசூல் என்பவர்தான் இந்த கொடூர சம்பவத்தில் உயிரிழந்துள்ளார். காதலித்து திருமணம் செய்து கொண்டதற்கான பகையே இந்த கொலைக்கு காரணமாக இருக்கலாம் என்ற கோணத்தில் போலீசார் தீவிர விசாரணை நடத்தி வருகின்றனர்.

நபி ரசூலும், அவர் காதலித்த இளம்பெண்ணும் வெறும் 15 நாட்களுக்கு முன்புதான் வீட்டை விட்டு வெளியேறி திருமணம் செய்து கொண்டதாக கூறப்படுகிறது. இந்த திருமணத்திற்கு மணப்பெண்ணின் குடும்பத்தினர் கடும் எதிர்ப்பு தெரிவித்திருந்தனர். இருப்பினும், நபி ரசூலின் குடும்பத்தினர் இருவரையும் அன்புடன் ஏற்றுக்கொண்டு, கடந்த வியாழக்கிழமை அவர்களுக்காக வீட்டில் திருமண வரவேற்பு நிகழ்ச்சியை ஏற்பாடு செய்திருந்தனர்.

நிகழ்ச்சி மகிழ்ச்சியாக முடிந்த பிறகு, அன்று இரவு சுமார் 11.30 மணியளவில், “ஒரு நண்பர் அழைக்கிறார்” என்று வீட்டில் கூறிவிட்டு நபி ரசூல் வெளியே சென்றார். ஆனால், அதிகாலை 2 மணி ஆகியும் அவர் வீடு திரும்பாததால், பதற்றமடைந்த குடும்பத்தினர் தேடத் தொடங்கினர்.

அப்போது, வீட்டிலிருந்து சுமார் 700 மீட்டர் தொலைவில் நபி ரசூல் உயிரிழந்த நிலையில் கிடந்ததாக கூறப்படுகிறது.

இது கொலைச் சம்பவம் என்பது உறுதி செய்யப்பட்டுள்ள நிலையில், அவரது மரணத்திற்கான துல்லியமான காரணம் குறித்து அதிகாரப்பூர்வ தகவல்கள் இன்னும் வெளியாகவில்லை.

காதல் திருமணத்திற்கு மணப்பெண்ணின் குடும்பத்தினர் தெரிவித்த எதிர்ப்பே விசாரணையின் முக்கிய கோணமாக இருப்பதாக போலீசார் தெரிவித்துள்ளனர்.

பெல்லாரி மாவட்ட காவல் கண்காணிப்பாளர் சுமன் டி. பெண்ணேகர் சம்பவ இடத்தை நேரில் பார்வையிட்டு விசாரணையின் முன்னேற்றத்தை ஆய்வு செய்தார். தடயவியல் நிபுணர்களும் சம்பவ இடத்தில் ஆய்வு மேற்கொண்டு முக்கிய ஆதாரங்களை சேகரித்துள்ளனர்.

இந்த வழக்கில் கௌல்பசார் போலீசார் வழக்குப்பதிவு செய்து விசாரணையைத் தொடங்கியுள்ளனர். குற்றவாளிகளை விரைவில் கைது செய்ய தனிப்படை அமைக்கப்பட்டுள்ளதாகவும், அதன் ஒரு பகுதியாக நபி ரசூலின் குடும்பத்தினர், நண்பர்கள் மற்றும் அப்பகுதி மக்களிடம் விரிவாக விசாரணை நடத்தப்பட்டு வருவதாகவும் போலீசார் தெரிவித்துள்ளனர்.

இந்த கொடூரக் கொலைக்கு காரணமானவர்களை விரைவில் கைது செய்து சட்டத்தின் முன் நிறுத்துவோம் என்ற நம்பிக்கையில் விசாரணை அதிகாரிகள் தொடர்ந்து தீவிரமாக செயல்பட்டு வருகின்றனர்.