தமிழக சட்டமன்றத் தேர்தல் முடிவடைந்த நிலையில், சென்னையில் நிலவிய வாக்குப்பதிவு நிலவரம் குறித்து முதலமைச்சர் மு.க.ஸ்டாலின் வெள்ளிக்கிழமை அன்று விரிவான ஆய்வு மேற்கொண்டார்.
தமிழகம் முழுவதும் ஏப்ரல் 23 அன்று விறுவிறுப்பான வாக்குப்பதிவு நடைபெற்ற நிலையில், மாநிலத்தின் பிற பகுதிகளைக் காட்டிலும் சென்னையில் வாக்குப்பதிவு சற்றே மந்தமாக இருந்தது. இது குறித்து அமைச்சர்கள் பி.கே. சேகர்பாபு, மா. சுப்பிரமணியன் மற்றும் சென்னையில் போட்டியிட்ட திமுக வேட்பாளர்களுடன் முதல்வர் ஆலோசனை நடத்தினார்.
அப்போது சென்னையில் வாக்குப்பதிவு சதவீதம் குறைந்ததற்கான காரணங்களை முதல்வர் கேட்டறிந்தார்.
தேர்தலுக்கு முன்னதாக பூத் ஏஜெண்டுகளுக்கு வழங்கப்பட்ட பயிற்சிகள் மற்றும் அறிவுறுத்தல்கள் சரியாகப் பின்பற்றப்பட்டதா?களப்பணிகளின் தற்போதைய நிலை என்ன? தேர்தல் நாளில் திமுகவினருக்கும் மற்ற கட்சியினருக்கும் இடையே ஏதேனும் மோதல்கள் ஏற்பட்டதா?திமுக மற்றும் அதன் கூட்டணிக் கட்சிகளுக்கு இடையேயான ஒருங்கிணைப்பு களத்தில் எவ்வாறு இருந்தது என்பது குறித்தும் முதல்வர் கேட்டறிந்தார்..
தி டைம்ஸ் ஆஃப் இந்தியா நாளிதழ் வெளியிட்ட செய்தியின்படி, இந்தக் கூட்டத்தில் நடிகர் விஜய்யின் தமிழக வெற்றிக் கழகம் (TVK) ஏற்படுத்திய தாக்கம் குறித்தும் விவாதிக்கப்பட்டது. தவெக கட்சி பெரும்பாலும் அதிமுக மற்றும் பாஜகவின் வாக்கு வங்கியைப் பிரிக்கும் என்று தகவல்கள் தெரிவிக்கப்பட்டாலும், சென்னையின் சில தொகுதிகளில் திமுகவின் வாக்குகளையும் அது கணிசமாகப் பிரித்திருக்க வாய்ப்புள்ளதாக முதல்வரிடம் தெரிவிக்கப்பட்டது.
இருப்பினும், இது குறித்துப் பேசிய திமுக செய்தித் தொடர்பாளர் டி.கே.எஸ். இளங்கோவன், “விஜய்யின் கட்சி தேர்தலில் எந்தப் பெரிய தாக்கத்தையும் ஏற்படுத்தவில்லை; அவர் போட்டியிட்ட தொகுதிகளில் கூட மக்கள் அவருக்குப் பெரிய ஆதரவை வழங்கத் தயாராக இல்லை” என்று கூறினார்.
தேர்தல் பரபரப்புகள் முடிந்த நிலையில், துணை முதலமைச்சர் உதயநிதி ஸ்டாலின் தனது குடும்பத்துடன் தனிப்பட்ட பயணமாக வெளிநாடு சென்றுள்ளார். அதேபோல், முதலமைச்சர் மு.க.ஸ்டாலினும் ஓய்வெடுப்பதற்காக கொடைக்கானல் செல்லத் திட்டமிட்டுள்ளார். 2021 மற்றும் 2024 தேர்தல்களுக்குப் பிறகும் அவர் கொடைக்கானல் சென்றிருந்தது குறிப்பிடத்தக்கது.
தமிழக சட்டமன்ற தேர்தலுக்கான வாக்குப்பதிவு ஏப்ரல் 23ஆம் தேதி முடிவடைந்த நிலையில், தேர்தல் தொடர்பான விவரங்களை தவெக தலைவர் விஜய் கேட்டறிந்தார். சென்னை பட்டினப்பாக்கத்தில் உள்ள தனது இல்லத்தில், கட்சியின் பொதுச்செயலர் ஆனந்த், நிர்வாக குழு ஒருங்கிணைப்பாளர் செங்கோட்டையன், தேர்தல் மேலாண்மை பொதுச் செயலர் ஆதவ் அர்ஜுனா ஆகியோரை விஜய் சந்தித்தார். ஒரு மணி நேரத்திற்கு மேல் நடந்த இந்த சந்திப்பில், வாக்குப்பதிவு விவரம், மக்கள் என்ன நினைக்கிறார்கள், தவெகவுக்கு சாதகமாக இருக்கும் தொகுதிகள், நிர்வாகிகள் எப்படி பணியாற்றினார்கள் போன்ற விவரங்களை விஜய் கேட்டறிந்ததாக கூறப்படுகிறது.
You must be logged in to post a comment.