சாளுக்கியா எக்ஸ்பிரஸ் ரயிலை செங்கோட்டை வரை நீட்டிக்க வேண்டும்; தமிழ்செல்வன் எம்எல்ஏ மற்றும் விழித்தெழு இயக்கம் வலியுறுத்தல்..

தீபாவளி பண்டிகையை முன்னிட்டு மும்பை – தென் தமிழகம் இடையே சிறப்பு ரயில்களை இயக்க வேண்டும் மற்றும் ரயில் எண் 11021 தாதர் – நெல்லை சாளுக்கியா எஸ்பிரஸ் ரயிலை சேரன்மகாதேவி, கல்லிடைக்குறிச்சி, அம்பை, பாவூர்சத்திரம், தென்காசி, செங்கோட்டை வரை நீட்டிக்க வேண்டும் என வலியுறுத்தி சீயோன் – கோலிவாடா சட்டமன்ற உறுப்பினர் கேப்டன் தமிழ் செல்வன் மற்றும் மும்பை விழித்தெழு ஒருங்கிணைப்பாளர் ஸ்ரீதர் தமிழன் ஆகியோர் கூடுதல் பொது மேலாளர் பிரபாத் ரஞ்சனை நேரில் சந்தித்து மனு அளித்தனர்.

ரயில்வே உயர் அதிகாரிகளிடம் அளிக்கப்பட்ட அந்த மனுவில், கேரளா சிறப்பு ரயில் எண்: 22113 எல்டிடி – கொச்சுவேலியை நாகர்கோயில் வழியாக நெல்லை வரை நீட்டிக்க வேண்டும். ரயில் எண்: 16339 மும்பை – நாகர்கோவில் எக்ஸ்பிரஸ் (தர்மாவரம், ஹிந்தாப்பூர், கிருஷ்ண ராஜபுரம் வழி) 4 மாநில வழியாக செல்கிறது. மும்பையில் 80 – 90 லட்ச தென்னிந்திய மக்கள் வாழ்கிறார்கள். இதில் தமிழர்கள் மட்டுமே 25 லட்ச மக்களுக்கு மேல் மும்பையில் வாழ்கிறார்கள். பொதுமக்கள் நலன் கருதி இந்த ரயிலை தினசரி இயக்க வேண்டும். மேலும் 8:30 மணிக்கு புறப்படும் நேரத்தை மாற்றி காலை 8 மணிக்கு இயக்க வேண்டும். ரயில் எண்: 11301 மும்பை – பெங்களூரு உதயன் எக்ஸ்பிரஸ் சேலம் வரை நீட்டிக்க வேண்டும். ரயில் எண்: 22159 மும்பை – சென்னை ரயிலை நெல்லை வரை நீட்டிக்க வேண்டும். மும்பை – சென்னை வழித்தடத்தில் வந்தே பாரத் ஸ்லீப்பர் எக்ஸ்பிரஸ் இயக்க வேண்டும். மும்பை – தமிழ்நாட்டுக்கு ராஜதானி, ஹம்சபார், கரிப்ரத் போன்ற ரயில்களை இயக்க வேண்டும்.

ரயில் எண்: 12619 & 12133 மும்பை – மங்களூரு ரெயிலை ராமேசுவரம் வரை (வழி பாலக்காடு, பொள்ளாச்சி, பழனி, மதுரை நீட்டித்து) வாரத்தில் 4 நாட்களுக்கும், மற்ற 3 நாட்கள் நெல்லை /தூத்துக்குடி வரையும் நீட்டித்து இயக்க வேண்டும். நெல்லை /தூத்துக்குடி வரை நீட்டிக்கப்படும் ரெயில் கொல்லம், செங்கோட்டை, தென்காசி, அம்பை, சேரன்மகாதேவி வழியாக இயக்கப்பட வேண்டும், ரயில் எண்: 16381 மும்பை -கன்னியாகுமரி ரயிலை பழைய வழித்தடத்தில் கன்னியாகுமரி -புனே க்கு பதிலாக மும்பை வரை இயக்க வேண்டும் , ரயில் எண்: 01143 மும்பை தூத்துக்குடி ரயிலை மறுபடியும் இயக்க வேண்டும் என கூறப்பட்டுள்ளது. மேலும் ரயில்வே அமைச்சரை நேரில் சந்தித்து மும்பை தமிழ் பயணிகளின் கோரிக்கைகளை வலியுறுத்துவேன் என சட்டமன்ற உறுப்பினர் தமிழ் செல்வன் தெரிவித்துள்ளார்.

செய்தியாளர்-அபுபக்கர்சித்திக்