நீதிமன்றத் தீர்ப்பு ஒன்றிய அரசின் அரசியல் பழிவாங்கல் முகத்திரையை கிழித்தெறிந்துள்ளது! – எஸ்டிபிஐ

டெல்லி மதுபானக் கொள்கை வழக்கில் அரவிந்த் கெஜ்ரிவால் உள்ளிட்ட அனைவரும் விடுதலை செய்யப்பட்டனர். நீதிமன்றத் தீர்ப்பு ஒன்றிய அரசின் அரசியல் பழிவாங்கல் முகத்திரையை கிழித்தெறிந்துள்ளது என எஸ்டிபிஐ கட்சி தெரிவித்துள்ளது.

இது தொடர்பாக எஸ்டிபிஐ கட்சியின் மாநில தலைவர் நெல்லை முபாரக் வெளியிட்டுள்ள அறிக்கையில் கூறியிருப்பதாவது; டெல்லி மதுபானக் கொள்கை வழக்கில் முன்னாள் முதல்வர் அரவிந்த் கெஜ்ரிவால் மற்றும் முன்னாள் துணை முதல்வர் மணீஷ் சிசோடியா உள்ளிட்ட 21 பேரையும் விசாரணை நீதிமன்றம் முழுமையாக விடுவித்திருப்பது, வெறும் சட்ட ரீதியிலான வெற்றி மட்டுமல்ல; இது ஒன்றிய பாஜக அரசின் அரசியல் பழிவாங்கல் முகத்திரையை அப்பட்டமாகக் கிழித்தெறிந்திருக்கும் ஒரு அறச்சீற்றமாகும்.

ஒன்றிய புலனாய்வு அமைப்புகளான சிபிஐ மற்றும் அமலாக்கத்துறை (ED) ஆகியவை, சட்டத்தின் காவலர்களாகச் செயல்படுவதற்குப் பதிலாக, ஆளும் தரப்பின் ‘ஏவல் படைகளாக’ மாறி, அரசியல் எதிரிகளை ஒடுக்கும் கருவியாக உருவெடுத்திருப்பதை இந்தத் தீர்ப்பு தோலுரித்துக் காட்டியுள்ளது. குறிப்பாக, ஒரு மாநில அரசின் இறையாண்மை மிக்க ‘கொள்கை முடிவை’ (Policy Decision), குற்றவியல் சதியாகச் சித்தரிக்க முயன்ற சிபிஐ-யின் போக்கு, அதன் நேர்மையைப் பாதாளத்திற்குத் தள்ளியுள்ளது.

மதுபானக் கொள்கையை உருவாக்கியதில் எந்தவிதமான குற்ற நோக்கமோ அல்லது சதியோ இல்லை என்று நீதிமன்றம் திட்டவட்டமாகக் கூறியுள்ளது. விசாரணை அமைப்புகள் ஒரு கற்பனையான குற்றச்சாட்டை உருவாக்கி, அதை ஆதாரங்களுடன் நிரூபிக்கத் தவறியிருப்பது, இது ஒரு ‘புனையப்பட்ட வழக்கு’ என்பதை உறுதிப்படுத்துகிறது. முறையான ஆதாரங்கள் இன்றி இத்தகைய கைது நடவடிக்கைகளை மேற்கொண்டதன் நோக்கம், எதிர்க்கட்சித் தலைவர்கள் மீது ‘ஊழல் கறை’ பூசி, அவர்களைப் பொது வெளியில் சிறுமைப்படுத்தி, அதன் மூலம் அரசியல் ஆதாயம் தேடுவதே ஆகும். இது தார்மீக அடிப்படையில் ஒரு ஜனநாயக அரசு செய்யக் கூடாத மிகப்பெரிய துரோகமாகும்.

இந்த வழக்கில் மணீஷ் சிசோடியா போன்ற ஒரு மக்கள் பிரதிநிதி, எந்த ஆதாரமும் இன்றி மாதக்கணக்கில் சிறையில் அடைக்கப்பட்டது தான் இந்த வழக்கின் மிகக் கொடுமையான அம்சமாகும். “விசாரணையே ஒரு தண்டனை” (Process is the punishment) என்ற நிலையை உருவாக்கி, “குற்றம் நிரூபிக்கப்படும் வரை அனைவரும் நிரபராதிகளே” என்ற சட்டத்தின் அடிப்படை விதியைத் தலைகீழாக மாற்றி, ஒருவரது தனிமனித சுதந்திரத்தைப் பறிப்பது அப்பட்டமான ஜனநாயக விரோதமாகும். ஒரு தனி நபரின் அரசியல் வாழ்வைச் சிதைக்க அரசு இயந்திரங்களைத் துஷ்பிரயோகம் செய்வது, ஆரோக்கியமான அரசியலுக்கு விடுக்கப்பட்ட பெரும் அச்சுறுத்தலாகும்.

மேலும், இந்த வழக்குகளின் காலநேரம் (Timing) மிக முக்கியமானது. தேர்தல்கள் நெருங்கும் வேளையிலும், எதிர்க் கட்சிகள் வலுப்பெறும் போதெல்லாம் இத்தகைய கைது நடவடிக்கைகள் திட்டமிட்டு அரங்கேற்றப்படுகின்றன. அரசியல் ரீதியாக எதிர்கொள்ள முடியாத தலைவர்களை, விசாரணை அமைப்புகளைக் கொண்டு முடக்குவது இந்திய அரசியலமைப்பின் ஆன்மாவான கூட்டாட்சித் தத்துவத்திற்கு (Federalism) விடப்பட்ட பெரும் சவாலாகும். ஒன்றிய விசாரணை ஏஜென்சிகள் தன்னிச்சையாகச் செயல்படாமல், டெல்லியில் உள்ள அரசியல் அதிகார மையங்களின் கட்டளைக்கு இணங்கச் செயல்படுகின்றனவோ என்ற ஐயத்தை இந்தத் தீர்ப்பு உறுதிப்படுத்தியுள்ளது.

இறுதியாக, இந்தத் தீர்ப்பு ஒன்றிய விசாரணை அமைப்புகளுக்கு விடுக்கப்பட்டுள்ள ஒரு கடும் எச்சரிக்கையாக அமைந்துள்ளது. போதிய ஆதாரங்கள் இன்றி அரசியல் அழுத்தங்களுக்காக வழக்குகளைப் பதிவு செய்வது, நீதிமன்ற நேரத்தை வீணடிப்பதோடு மட்டுமல்லாமல், பொதுமக்களுக்கு நீதித்துறை மற்றும் புலனாய்வுத் துறை மீதுள்ள நம்பிக்கையையும் சீர்குலைக்கும். இந்த விடுதலையானது, விசாரணை அமைப்புகள் அரசியல் சார்பற்று, சட்டத்திற்கு உட்பட்டு இயங்க வேண்டியதன் அவசியத்தை மீண்டும் ஒருமுறை உரக்கச் சொல்லியுள்ளது.

அதிகார பலத்தால் எதிர்க்குரல்களை ஒடுக்க நினைக்கும் ‘சர்வாதிகாரப் போக்கிற்கு’ இந்தத் தீர்ப்பு ஒரு எச்சரிக்கையாக அமைந்துள்ளது. இவ்வாறு அவர் அந்த அறிக்கையில் தெரிவித்துள்ளார்.